Egun osoko festa, babarrunaren bueltan

Ibarrako Hauspoa elkarteak babarrun jana antolatu du gaur. Lehiaketa gastronomikoa, bazkari herrikoia eta arratsaldean kantuan ibiliko dira.

Goizean goizetik aritu dira babarruna prestatzen Ibarrako plazan. 12 parte hartzaile izan dira, bikoteka, lehiaketan parte hartu dutenak. Hauspoa elkarteko antolatzaileek, kilo erdi babarrun eta ura baino ez diete eman sukaldariei. Hortik aurrera norberak erakutsi behar du babarruna prestatzeko artea.

Arratsaldean emango dira ezagutzera saridunen izenak. Lehen saridunek (Eva Zubelzu eta Mila Jauregi) txapela, mantala eta 125 euro eraman ditu herriko komertzioetan gastatzeko; bigarrenek (Josetxo Otxoa eta Edurne Santin), mantala eta 75 euro; eta hirugarrenek (Idoia Gonzalez eta Idoia Jometon) mantala eta 50 euro.

Hala ere, Hauspoa elkartekoak 13 kilo babarrun prestatzen aritu dira goiz osoan zehar, eguerdian plazan bertan egingo dute bazkari herrikoirako. 130 lagun dira bazkaltzera joatekoak. Babarrunarekin batera, aza eta txerri kostila jarriko dute, eta noski, Ibarrako piparra. Postrerako gaztelekukoak aritu dira lanean eta bizkotxoa eta bonboiak prestatu dituzte.

Eguerdian Euskararen Egunaren harira Galtzaundik martxan jarri duen Hitzolariak egitasmoari egin diote leku eta arratsaldean, kantu biran ibiliko dira herrian zehar, eta 20:30ean afari meriendarekin amaituko dute eguna.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!