Txupinazoaren osteko kalejirarekin batera hasi dira gaztetxoenak Gaztezulok antolatutako jolas kooperatiboetan. Haur mordoa bildu da, eta taldeka, jolas ezberdinak probatzeko aukera izan dute, txandatuz. Bien bitartean, helduek toka txapelketa jokatu dute, eta pintxo potea egin dute, bazkarirako indarrak hartzeko.
Auzotar talde batek paella prestatu du bazkarirako, eta plazan jarri duten karpan bilduko dira otordurako. 16:00etan, bingo herrikoia egingo dute, eta ondoren, 17:30ean, Hodei magoarekin Tutti magia ikuskizunaz gozatzeko aukera izango da. Horren ostean, mahai jokoak eta txapa tailerra prestatu dituzte, hau ere Gaztezuloren eskutik, eta jarraian, 3rok taldeak doinu kubatarrak joko ditu, gorputzak dantzan jartzeko. 20:30ean izango da azken ekitaldia: zezen suzkoa auzoan barrena ibiliko da, eta gorputzak ahalbidetzen badu, festaz gozatzen jarraituko dute auzotarrek.