Larunbatean emango diote hasiera festari. 10:00etan Giroarte taldearen eskutik diana izango dute, eta Karlatz taberna izango da poteoan hasteko lehen taberna. 11:00etan, hamaiketakoa egingo dute taberna horretan, eta kalejiran, Danon Txokoa, Txumitxa, Gaztelubide, San Bartolome plaza eta elkartea pasatuko dituzte. 14:00etan, Urdaiazpikoa moztuko dute eta ondoren, bazkaria izango dute trikitilariek alaituta.
Hurrengo egunerako, iganderako, bola eta toka txapelketak antolatu dituzte. 10:00etan hasiko da izen ematea, eta 10:30ean hasiko dira txapelketak. Izena eman nahi duenak 5 euro ordaindu beharko ditu. Herriko lehen hiru sailkatuek, emakume zein gizonek, eta orokorreko lehen hirurek, saria izango dute. 11:30ean, meza nagusia izango dute hildako elkarteko bazkideen omenez.