Indarrik baldin badute gordea, gaur dute demostratzeko eguna ibartarrek. Asteazkenean hasi zituzten jaiak, eta azken egunera iritsi dira dagoeneko. Ez dute, ordea, egunik makalena: kuadrilla eguna ari dira ospatzen.
Eguerdiko kanpaiak jo bezain pronto kuadrilla berriari ongietorria egin diete plazan: Beldurripe izena duen lagun taldea oholtzara igo da, eta haiek izan dute ardura txupinazoa botatzeko. Horren ostean, irailaren 16an egingo den makroepaiketaren harira, Minde ibartarraren eta Kudu elduaindarraren aldeko brindisa egin dute. Xanpaina dastatu ondoren kalejiran ibili dira herriko kaleetan barrena Bonberenea txarangarekin eta Giroarte dultzaina taldearekin batera.
Aurten ere, ohiturari jarraituz, Piperrak kuadrillak sukalde ibiltaria atera du kalera eta tomate eta piperren pintxoak prestatu dituzte herritarrei banatzeko. Horiez gain, Sardinerak ere ez dira atzera begira geratu; parrilarekin sardinak erre eta guztiek dastatzeko aukera izan dute.
Egun luzea dute aurretik Ibarrako kuadrillek. Ikusi hemen egitaraua.