Ibartarrak ohituak daude sanbartolomeak euritan pasatzen, baina, momentuz, aurtengoek arrazoi gehiago eman dizkiete itzal bila trebatzen hasteko. Eta, bide horretan, haur danborrada itzalari erronka botatzeko bidea izan da, 11:30ean, hasita, Euskal Herria kalean gora.
Dantzariek ireki dute bidea, eta ura lagun izan dute, dantza-jauziak eguzkiarekin uztartu ahal izateko. Atzetik, haur gazteenak lehenengo, eta adinaren arabera antolatutako gainerakoak, ondoren, taldetxotan. Eta, erdian, sanbartolomeei soinu banda jarriz ari den Iraunkorrak txaranga.
Makin, danbor eta barril hotsez herria piper jatera deitu eta gero, plazan amaitu dute 2019ko danborrada, konfeti eta serpentina artean.
