Honezkero badira 24 ordu sanbartolomeak suziriaren esanetara jarri zirenez geroztik, eta ordutik honakoa erredoble erraldoi baten modukoa izan da, jaietako hitzordu garrantzitsuenen txindata hotsa noiz helduko. Bada, erredoble horri perkusio pixka bat gehiago jartzera irten dira, gaur, dozenaka ibartar, helduen danborradan parte hartzeko.
Urtero bezala, udaletxe atarian elkartu dira, danbor jotzaile, barril jotzaile, dantzari, zuzendari zein ikusle, eta Iraunkorrak txarangak gidatu du hitzordua. Afalondoren ere danbor giroz jarraituko dute parte hartzaileek, eta zezen suzkoa izango da, gainera. Plazako oholtzan, berriz, 23:30etik aurrera, Nizuri Tazuneri eta Modus Operandi taldeek saio bana eskainiko dute.
Sanbartolomeetako lehen danbor hotsak jo eta entzun ahal izan dituzte Ibarrako festazaleek, baina ez dira azkenak izango: larunbatean haur eta gaztetxoenen txanda izango da, zapi morea lepoan eta makilan eskuetan.
