San Bartolome jaiak ate joka diren honetan hasi dira lanean Ibarrako bi udaltzainak, Oskar eta Josu. Ibarrako Udalak 2017ko uztailean ekin zion bi udaltzain lanpostu jabetzan betetzeko lehiaketa-oposizioaren deialdiari, eta tramite guztiak amaitu berritan, gaur hasi dira udaltzain berriak Ibarrako kaleetan lanean.
Udalaren aukeraketa frogak bete eta gainditu ondoren, Arkaute Akademian igaro dituzte azken hilabeteak beharrezko formakuntza jasotzen eta euren opor egunak bete ondoren, herriko jaietarako prest dira langileak.
Hasiera batean herriaren ezagutza egingo dutela aurreratu du udalak, herriko gune desberdinak identifikatzeko. Bide horretan, herritarren kooperazioa ongi etorria izango dela nabarmendu dute.
Aurrera begira, Udaltzaingoaren zereginak une bakoitzean ezarritakoak izango dira, bereziki, honakoak: udaleko agintariak eta ondasunak babestea, hiritarren segurtasuna eta babes zibila, mugikortasuna eta bide-segurtasuna, polizia administratibo eta judiziala eta bestelako eginkizunak.