Pertsona bat atxilotu du Polizia Nazionalak jihadismoarekin lotuta

Tolosaldeko Ataria 2019ko uzt. 23a, 10:10

Emeterio Arreseko etxebizitza batean egin du atxiloketa Espainiako Polizia Nazionalak. Gipuzkoan burutu den operazioaren barruan kokatzen da, eta Ibarraz gain, Urretxun eta Urnietan ere izan dira atxiloketak.

Atxiloketa Emeterio Arrese kaleko 15. zenbakiko etxebizitza batean gertatu da, eta bertako lekukoek adierazi duetenez, tiro hotsak entzun dira atxiloketaren unean. 06:00ak aldera Polizia Nazionaleko lau furgoneta gerturatu dira, eta atxiloketaren ondoren, atxilotuaren etxebizitza miatzen egon dira.

Ibarran bezala, Urnietan eta Urretxun ere burutu du jihadismoaren aurkako operazioa Polizia Nazionalak, eta herri horietan ere atxiloketa bana burutu du. Sare sozialetan terrorismoa goratzea egozten diete hirurei. Poliziaren datuen arabera, talde homogeneo eta kohesionatu bat osatzen zuten. Hasieran, Daesh talde jihadistak zabaltzen zituen edukien kontsumitzaile ziren. Denborarekin, ordea, kontsumitzaile izatetik gisa horrelako edukiak zabaltzeko jauzia eman zuten, eta Gipuzkoako zirkulu salafistaren parte izatera igaro, betiere aipatutako iturrien arabera.

Ikerketaren arabera, handitzen joan da hiru atxilotuek euren komunitate birtualean zuten doktrinatzeko gaitasuna. Hala ere, azken aldian nabarmen zaindu dute sareko jarduera, Poliziaren esanetan, berriki egin diren polizia operazioak direla eta atxilotzeko beldurra zutelako.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!