Cies irletatik San Simon irlaraino da ibilbidea. «Galizian egiten da eta ekainean ura hotza egoten da. Bestetik, 27 kilometroko ibilbidea du», esan du Mateosek, probaren gogortasuna azaltzeko. Ehun partaide ingurutik 14k utzi egin zuten, horietatik 12 hipotermiarengatik.
Sailkapen orokorrean 18. postuan ageri da Mateos, eta zeharkaldi tradizionalean 14. postuan amaitu zuen gizonezkoen sailkapenean. 6.58.22ko denbora egin du ibartarrak, eta «oso pozik» agertu da egindako markarekin: «Zazpi eta zortzi ordu bitartean bukatzeko asmoz joan nintzen probara, eta espero baino denbora gutxiagoan egin nuen».
Hiru igerilari modu librean atera ziren. Beste guztiek, Mateos tartean, 12. kilometroa arte kontrolpean igeri egin zuten, erritmo jakin batzuen arabera egindako taldeetan. «Zortzigarren kilometrotik aurrera erabaki nuen Alex Zabala igerilari zarauztarrarekin igeri egitea, eskarmentu handikoa, eta gero, hamabitik aurrera nire erritmo taldetik tiratzen aritu nintzen». Bukaera «dena emanda» joan zen, eta gustura geratu da egindakoarekin.