2018ko udaberrian, “Txori habiak eraikitzeko eta kokatzeko tailerra” eman zuen Ibarrako Udalak, Aranzadi Zientzia Elkartearen laguntzarekin, Uzturpe Ikastolan. Orduan, hamar habi eraiki eta kokatu zituzten, herriko hainbat zuhaitzetan, LH6ko ikasleek. Horiei esker, esaterako, txantxangorrien, txonten, enaren, txolarreen, okil berdeen edo kaskabeltzen ezaugarriak ezagutzeko aukera izan dute.
Habi kaxa hauek kokatzearekin, espezie horiek errekuperatzea dute helburutzat. Izan ere, zenbait hegaztik populazioaren jaitsiera jasan du azken hamarkadetan, beraien bizilekuak degradatu dituztelako zuhaitzen mozketen, pestiziden edo baimenik gabeko ehizaren ondorioz. Hori dela eta, hegazti batzuek zailtasunak dituzte beraien habiak eraikitzeko leku aproposak aurkitzeko.
Hegaztiei laguntzearekin batera, ikasteko aukera ere eduki dute Uzturpe Ikastolako ikasleek. Izan ere, duela urtebete kokatutako habi kaxak gainbegiratu eta aukera izan dute, besteak beste, espezieen jarraipena egiteko, euren ohiturak ezagutzeko eta nola ugaltzen diren jakiteko.
