Berri Txarrak-en sarrerak di-da batean amaitu dira

Tolosaldeko Ataria 2019ko ots. 5a, 17:38

11:00etatik zain ziren batzuk Ibarrako gaztetxearen kanpoan. Dozena bat lagun elkartu da segidan. Ondoren, 14:00ak inguruan, ilara luzatzen hasi da, kultur etxeraino iritsi arte.

Batzuk siesta egin gabe, besteak lanetik edo ikastetxetik lehenago aterata; guztiek nahi zuten Berri Txarrak-en kontzertuko sarrera. 17:00etan zabaldu ditu ateak gaztetxeak, eta ti-ta batean amaitu dira. Ilarako jende guztiarentzat ez dira iritsi, bakoitzak lau erosteko aukera baitzuen. Lortu dutenak pozik, besteak triste, beraz.

Kontzertua otsailaren 24an izango da, 19:00etan. Gaztetxeko ateak 18:30ean irekiko dituzte. "Kontzertuen historiala errepasatuta ikus daitekeenez, bi urte luze joan dira Euskal Herriko areto zein gaztetxeetan bira bat egin genuenetik (2017ko hasiera). Gogotsu gaude beraz, otsaila-martxorako iragarri ditugun 12 saio txiki hauei ekiteko, hauetako leku asko bereziak izan baitira gure ibilbidean", esan du taldeak. 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!