Goizean, 09:00etan emango zaio hasiera IX. Babarrun Lehiaketari. Antolakuntzak jarriko ditu babarruna eta ura, eta gainerako tresnak norberak eraman beharko ditu. Kilo erdi babarrun sukaldatu beharko dute.
Eguerdian, Alegiako txarangarekin kalejiran ibiliko dira, eta Euskaraldia bete-betean harrapatuko duenez, mintzapraktika egingo dute Ahobizi eta Belarriprest guztiek herriko kaleetan zehar. Bazkaltzeko plazan elkartuko dira berriro ere. Aurrez, tiketak salgai egongo dira, bai bazkarirako, baita lehiaketarako ere, Zubiaurre, Galtzaundi, Atari, Txumitxa eta Karlatzen.
Bazkalostean, babarrun lehiaketako sariak banatuko dituzte, eta Euskaraldairekin lotutako jolas bat egingo dute. 18:30ean, Ibarrako Koroaren laguntzaz kantu biran ibiliko dira. Eguna amaitzeko, afari-merienda egingo dute Ibarrako Gazte Asanbladakoek prestatutako bokatekin, eta dantza-festarekin borobilduko dute eguna Gaztetxean.
