Finalera pasatzeko kanporaketan Mujikak laugarren egin bazuen ere, atzo txapeldun izan zen Iurretako pilotalekuan jokatutako finalean.
Ibartarrak Juan Jose Lopez Azpilikueta, Luis Txapartegi, Aratz Mugertza, Arkaitz Jauregi eta Jose Antonio Etxeberria izan zituen aurkari, eta ia enbor guztietan denborarik onena markatu zuen.
Sei pago enbor ebaki behar izan zituzten: bi kana erdiko, bi 60 ontzako eta bi oinbiko. Egurrekin nahiko lan izan zuten aizkolari batzuk, gibelean adarrak azaldu baitziren behin baino gehiagotan. Lopezek, esaterako, aizkora zartatu zuen, eta denbora ugari galdu zuen.
Hain zuzen, Lopezek, Mujika eta Mugertzaren ia denbora berean moztu zuen lehen enborra, minutu eta erdiren bueltan. Bigarren enborra ebakitzerako, ordea, Lopezi minutuko aldea ateratzen zion ibartarrak. Arkaitz Jauregi jarri zen bigarren postuan 60 ontzako lehen enborra ebakitzerako, baina ordurako minutu erdiko abantaila zuen Mujikak bere alde.
Tarte hori zabalduz joan zen ondorengo lanetan. 20 minutu eta 43 segundo behar izan zituen Jexux Mari Mujikak sei enborrak ebakitzeko. Ia minutuko aldea atera zion bigarren izan zen Luis Txapartegiri (21:37). Hirugarren Aratz Mugertza izan zen, 22:28ko denbora eginda. Joxean Etxeberria (22:30), Juan Jose Lopez (22:46) eta Arkaitz Jauregi (23:36) sailkatu ziren ondoren, hurrenez hurren.
Jexux Mari Mujikak, baita bigarren izan zen Txapartegik ere, lehen mailan lehiatuko dute datorren urtean.
