Asteburu bete izan zuten Ibarrako Kirol Elkartean. 52. urteurrena dela eta bazkaria egin zuten larunbatean, eta igandean bola eta toka txapelketak izan zituzten Emeterio Arresen. Bola Txapelketan 48 pertsonek eman zuten izena, eta Toka Txapelketan, berriz, 26k. "Iragarrita zegoen eguraldia ikusita ezin dezakegu esan partaide zein ikusle gutxi azaldu zirenik", esan dute elkarteko zuzendaritzatik.
Irabazleak bolatan Sergio Aristi zarauztarra eta Garbiñe Alustiza zeraindarra izan ziren, eta tokan Prudentzio Olano eta Maritxu. "Herriko partaideak ere izan ziren eta haien artean aurpegi berri batzuk ere. Emakumeen partaidetza handiagoa bota genuen faltan, eta sari batzuk banatu gabe utzi behar izan genituen. Horregatik animatzen dugu mundu guztia parte hartzera, aurrerantzean ere izango baita aukera", esan dute. Zuzendaritzak boluntario lanetan ibilitakoei eskerrak eman dizkie.