Duela sei bat hilabete Aranalde Espainiaratu ahal zutela eta Maite Aranalde momentu horretan Frantzian zegoen preso Ibarrako hainbat taldek eta norbanakok bat egin zuten eta talde bakoitzak gaia landu zuen. «Behin Maite Espainiaratuta taldeak elkartu eta gaiari heltzeko zer egin genezaken aztertu genuen», esan du Oihana Lopetegi ibartarrak. Lehen urrats bezala azken ostiralei bultzada berezia ematea adostu zutela ere esan du Lopetegik. «Azken ostirala talde, eragile edo norbanako desberdinen esku uztea erabaki genuen, eta gaur izango da lehendabizikoa».
Ekimena harago doa, hala ere: «Ez da azken ostirala beste norbaitek antolatuko duela bakarrik, antolakuntza berri horrek ekitaldiari beste izaera bat ere emango baitio. Orain arte Ibarra sarreran elkartu izan gara formatu berean, eta aurrerantzean talde bakoitzak erabakiko du hitzorduak zein formatu izango duen, zein lekutan egingo den eta abar».
Gaurko lehen hitzordurako lekua eta ordua mantendu dute, 19:30ean elkartuko dira herri sarreran, baina izaera berezia izango du. «Antolatzaileak Maiteren lagunak gara eta berezia izango da. Aitzaki honekin garai batean biltzen ginen lagunak berriz ere elkartu gara, eta gutun bat idatzi diogu eta musika ere jarriko dugu. Guretzat hunkigarria izango da».
