Aranalde Rennes espetxean dago, baina atzo bertan Fresnesera eraman zuten eta senitartekoek uste dute estradizioa prestatzen ari direlako lekualdatu dutela. Izan ere, Frantziako kondena da irailaren 20an bukatuko duena, baina senitartekoek ez dakite zer pasako den ondoren, bi euroagindu dituelako.
Printzipioz Espainiako epaileen esku utziko dute eta epaileak erabakiko du zer egin. «Ikusiko da zer gertatzen den, oraindik ez dakigu ezer. Irailaren 20tik hamar eguneko epea irekiko da Espainiaratzeko, baina ez dakigu zuzenean eramango duten edo ez», esan du Aranalderen amak, Gotzone Ijurkok.
Estradizio eskaerak direla eta, herriko hainbat eragilek eta norbanakok Maiteherriratuz dinamika abiarazi zuten urte hasieran eta kaleratzearen gertutasuna ikusita datozen egunetarako dinamika indartu dute, «Maiteren egoera herrian ezagutarazi eta estradizioaren aurka lanketa egiteko».
MEGAFONIA
Horiek horrela bihar megafonia jarriko dute herrian zehar informazioa emateko; hilaren 16ko Ibarra, Azoka eta Piparra azoka berezian 12:00etan argazki herrikoia aterako dute plazan; eta hilaren 20an, kaleratzearen egun berean, batzar informatiboa egingo dute 19:30ean, herri sarreran.
Hamahiru urte dira Maite Aranalde ibartarra espetxean dagoela. Frantziako Rennes espetxean eman ditu azken hilabeteak, etxetik 800 kilometrotara.