Giroarte dultzaina taldea eta Bonberenea txarangak alaiturik, hainbat kuadrilla atera dira Ibarratik zehar poteoa egiteko. Tartean izan dira Ardoki eta Zergatik ez? kuadrillakoak ardoa banatzen, Piperrak kuadrillakoak Ibarrako piperrak eta tomatea banatzen, eta Sardinerak kuadrillakoak, noski, sardinak erre eta banatzen. Azken hauek, gainera, aldarrikapen eta guzti eginez, "Pentsioak bai, erretirorik ez" lelopean.
Ardoki kuadrillakoak 35 urte inguru hasi ziren ardoa banatzen, eta gero gehitu zitzaien Zergatik ez? kuadrillakoak. 100 litro ardoko kupela sartzen dute auto barruan, fresko egoteko izotzarekin eta landareak jarriz, eta jendeari banatzen joaten dira. Aurretik, gosaltzeko, elkartean baba beltzak jateko ohitura dute.