Alurr dantza taldeak bi urtez behin antolatzen du Dantzari Txiki Eguna eta aurten tokatzen da berriz ere ospatzea. Larunbaterako prestatu dute dantzari txikien eguna 10:00etan hasita. Bidania-Goiatz, Altzo, Berrobi, Faltzes, Lesaka, Deba eta nola ez, Ibarra bertako dantzariak izango dira kalean goizetik. «Plazan lekurik badugu behintzat, herriko dantzariez gain 300 haurren esperoan gaude», esan du taldeko Eli Nosellasek.
Goizean kalez kale ariko dira dantzariak eta ondoren bazkaria egingo dute plazan. 16:00etatik aurrera Gauargi taldearen erromeria egongo da.
Ikasturte amaierakoa
Ez da hori Alurren asteburuko ekitaldi bakarra, dena den. Ostiralean Urrats emanaldia eskainiko dute plazan, 22:00etatik aurrera. «Urrats ikuskizunarekin tradizioari jarraituz ikasturte amaierako emanaldia eskainiko dugu, urtero bezala», argitu du Nosellasek. Alurreko 11 taldek hartuko dute parte, 150 bat dantzarik. «Aurten gainera fandango eta arin-arin lehiaketako lehen eskolak jasotzen hasi diren gazteek era hartuko dute parte», esan du. Gazteek dantza tradizionalak eskainiko dituztela aurreratu du dantza taldeko kideak, baina euskal pausoetan oinarritutako koreografiek ere izango dutela tokia gaineratu du. «Egun hori urduritasunez eta alaitasunez betetakoa izaten da, izan ere, ikasturte osoko lana erakusten da herrian bertan», esan du.
Ibarran bertan aritu eta gero, igandean, Hondarribiara joango da Alurr dantza taldea. Itsas Etxe Auditorioan Irradak emanaldia eskainiko dute 20:00etatik aurrera.