Etxeko taldea gogo biziz irten da kantxara, eta lehen minutuetan nagusi izan da jokoan. "Taktikoki oso ongi jarrita zeuden, eta joko ona egin dute", azaldu du Olatz Artola, ibartarren entrenatzaileak.
Bizkaitarrak kanpoaldetik saiatu dira gola egiten, baina Lorena atezain ibartarra bikain aritu da gaurkoan. Pixkanaka santurtziarren presioa gainetik kentzen hasi dira eskualdeko neskak, eta arrisku gehiago sortzeko aukerak izan dituzte. Hutsean amaitu da lehen zatia.
Bigarrenean sinetsi egin du Lauburuk. Eta bigarren zatiaren bigarren erditik aurrera aurrerapauso bat eman dute. Presioa egiten hasi dira, eta neurketa asko parekatu da. 9 minuturen faltan, ordea, etxeko taldearen lehen gola iritsi da. Moretxoek, ordea, ez dute etsi, eta atezain jokalariarekin aritu dira. Asko estutu dute, eta erasoan erabat sartuta ziren. Kontraeraso batean, ordea, Santurtzik bigarrena egin du eta ibartarren ametsa ezerezean utzi du. "Ez dugu etsi eta hortik aurrera ere minutu oso onak jokatu ditugu", azaldu du Artolak.
Euskadiko Txapelketako finalean porrota jaso dute, baina egindako denboraldiarekin pozik eta harro dira. Eta ez da gutxiagorako. Euskadikoa, hurrengo batean izango da.
