Ibarrako piperraz parte hartze prozesu bat irekitzea da ideia faktoriaren helburua. Hiru zatitan egingo dutela esan du udalak; alde batetik, herriko ekoizleekin elkarrizketak egiten ari dira, bestetik herriko talde desberdinei galdetegiak egin dizkiete, eta azkenik herritarrei irekitako ideien faktoria abiarazi dute, herritarren iritziak jasotzeko.
Azken zati horri dagokionez, kultur etxeko areto nagusia paperekin estali dute, eta asmoa da herritarrak maiatzaren 30a bitarte hara gerturatu eta errotuladoreekin euren iritziak idaztea paperetan. Zer da piperra zuretzat?, zein ekintza egingo zenuke piperraren inguruan?, edo 2025. urtea eta piperra: Nola nahiko zenuke ikusi Ibarrako piperra? galderak erantzun ahal dira abiapuntu bezala.
Udalak herritarrei egin die dei, ekimenean parte hartu eta piperraren bueltan egin beharrekoa guztien artean adosteko.