Txori habiak eraikitzen eta kokatzen ikasteko tailerra jaso zuten pasa den astean, Uzturpe ikastolako LH 6. mailako ikasleek. Aranzadi Zientzia Elkarteak eskaini zuen tailerra, Ibarrako Udalak gonbidatuta, eta guztira 10 habi eraiki eta jarri zituzten. Era berean, txori espezie ezberdinen ezaugarriak ikasteko aukera ere izan zuten.
Aranzadik esandakoaren arabera, zenbait hegazti motaren populazioaren beherakada eman da azken hamarkadan eta "atzerapauso garrantzitsu eta kezkagarria" dela dio zientzia elkarteak. Galera hori habitataren degradazioaren ondorioz eman da; mozketa ugariak, pestizidak, baimenik gabeko ehiza... Izan ere, basoan bizi diren hainbat espeziek zuhaitz zahar eta handiak behar dituzte habiak egiteko, eta mozketen ondorioz zailtasunak dituzte habientzat leku aproposak aurkitzeko. Uzturpe ikastolako gazteek jarritako habiekin espezie horien berreskurapenean lagunduko dute.
Ibarrako Udaleko Ingurumen, Merkataritza eta Nekazaritza teknikariak esan duenez, habien jarraipena egingo dute eta hurrengo hitzordua ekainaren hasieran izango dute. Besteak beste, euren ohiturak zeintzuk diren ezagutu ahal izango dute.