Emakumezkoek lortu dute eguneko lehen domina. 540 kiloko mailan izan da, eta hori gutxi balitz, podiuma euskal taldeek osatu dute bere osotasunean. Laukizko Gatedi izan da onena, finalean Gasteizko Badaiotz garaituta. Ibartarrek hirugarren egin dute, etxeko taldeari irabazi ostean.
Gizonezkoen artean, Irlanda izan da txapeldun; Eskozia bigarren izan da, eta Ibarrak hirugarren postua lortu du, 600 kilokoan. Hirugarren domina maila mistoan lortu dute ibartarrek.
Pozarren zen Eugenio Lopetegi, Sokatira taldeko lehendakaria: "Emaitza hauek erakusten dute Euskal Herrian maila altua dagoela. Horrelako txapelketetan domina lortzea oso zaila da, eta egin dutena meritu handikoa da", azaldu dio TOLOSALDEKO ATARIAri.
Bihartik aurrera, nazioartekoa
Kluben arteko lehia alde batera utzita, asteburuan, nazioarteko txapelketari emango zaio hasiera. Ibarrako tiralariek Euskal Herriaren izenean lehiatuko dute, 3 probatan.
680 kilokoan, Euskal Herriko txapelketa irabazi zuen Ibarrak, eta Txinan jokatzeko txartela eskuratu zuen. 640 eta 600 kilokoan, berriz, txapeldunorde izan ziren moreak, baina txapeldunek uko egin zioten lehiatzeari eta ibartarrek hartuko dute euren lekua.