Espainiako Omniuneko proba irabazi zuen Iribarrek joan den astean, eta emaitza horri esker pistako selekzioarekin profesional mailan debuta egiteko aukera sortu zitzaion.
Atzo osatu zuen lehen lasterketa txirrindulari onenen artean, Mallorkan. Tropelean maila handiko kirolariak ziren, Alejandro Valverde edo Markel Irizar, besteak beste.
Iribarrek 90. postuan amaitu zuen, John Degenkolb Trek taldeko txirrindulariarengandik 54 segundora. Jauzia nabaritu duela aitortu du Iribarrek: "Jubenil mailako azken lasterketa 57 kilometrokoa izan zen, gaurkoa, aldiz, 179koa. Erritmoa bizia izan zen, bereziki azken orduan."
Azken kilometroan gelditu zen atzean, tropela puskatu egin zen sprint-a prestatzean. "Ikaragarria da zeinen kontrolpean izaten duten ihesaldia. Nahi izan zutenean erritmoa estutu eta harrapatu genituen".
Hala ere, lasaitasunez hartu du egunotako martxa. "Esperientzia bikaina izaten ari da. Ez dut ezer galtzeko eta hortaz, lasai nago. Gozatzen ari naiz", aitortu du gazte ibartarrak.
Igandera arte izango da Mallorkan, profesionalen ondoan. Gero, Ampo taldearekin afizionatu mailako lasterketetan hartuko du parte. Maila horretan egingo duen lehen denboraldia izango da.