Kiroldegia hobetzeko lanak egiten ari dira Ibarran. Udaran kantxako argiteria berritu dute eta Led sistemako 34 argi jarri dituzte energia eta argi kontsumoa murrizteko helburuz. Hil honetan zehar markagailua aldatuko dute.
Horiek dena den, ez dira datozen asteetan kiroldegian egingo dituzten lan bakarrak. Mantentze lanak egingo dituzte hidroterapia gelan. Batetik spa putzua berrituko dute eta bestetik, sauna berri bat jarriko dute.
Hidroterapia gelako ekipamenduak zaharrak dira jada eta hori dela eta aldatuko dituzte. Spa putzua ia urtebetez itxita egon da itoginak zituelako eta beraz, saunaz gain, gelako aireztapena, zoladura eta leihoak ere aldatuko dituzte. Era berean, baporeko ekipamendua mantenduko dute eta emakumeen behe solairuko aldagelako sabaia berrituko dute.
Lan horiek guztiak egiteko 55.000 euro bideratuko dituzte eta printzipioz hiruzpalau astetan egingo dituzte. Kiroldegia hala ere, ohi bezala irekiko dute eta lanak kanpoaldetik egingo dituztenez ez dute eragozpenik sortuko; hori bai, aste horietan ezingo da hidroterapia gela erabili.