Kirolaren eguna dute, gaur, Ibarran, eta horren erakusgarri izan da, goizean, Emeterio Arrese plaza. Haur, gazte, heldu nahiz erretirodunentzako izan da zer ikusi eta zer egina. 3x3 futbol txapelketa antolatu du, batetik, Lauburu kirol elkarteak; neska-mutilek azkar aritu behar izan dute kantxa estuan barrena.
Aldi berean, bola txapelketa ere martxan izan da, aldamenean. Ibarrako kirol elkarteak antolatuta, erretirodunek ekin diote hitzorduari, eta haur eta gaztetxoen txanda iritsi da gero.
Arratsaldean, besteak beste, emakumezkoen giza-probak hartuko du Euskal Herria kalea. Dena den, dena ez da kirola izango eta, biharko egun handiaren atarian, sanbartolomeetan gaur ere ez da txaranga eta jakirik falta izango.