Ate joka dira Ibarrako festak eta, aspaldidanik egin ohi den bezala, Tolosaldeko herritar askok San Bartolome jaiak aukeratuko dituzte, udari adio esateko. Dantzaz, algaraz eta musikaz gain, ordea, ibartarrek jaien alderik ilunenari begira ere jarri nahi izan dute, festen atarian: eraso matxistei begira.
Horrela, udalak hainbat ibartarren aurpegiak baliatu ditu, Ibarran ez ezetz da! bideoa osatzeko. Ikus-entzunezkoaren bitartez herritarrei helarazi nahi izan dizkiete, emakumeek egunero bizi edo sentitu ahal dituzten egoerak, enpatia sortuz; eraso matxisten aurkako argi gorria indartsu piztuz.
Guztia, mezu argi batekin amaitzeko: Ibarrako jaietan inork ez duela inolako eraso matxistarik onartuko. Sare sozialetan zabaldu dute bideoa, eta erasoen aurrean laguntza eskatzeko balia daitezkeen bideak ere eskaini dituzte ikus-entzunezkoaren amaieran.