Ibarra sarreran, Tolosana inguruan, oinezkoen bidea itxi dute. Tolosako Udalak egin behar dituen egokitze lan batzuen ondorioz itxi behar izan dute pasabidea eta urria bitarte egongo da itxita, aurreikuspenen arabera. Ondorioz, oinezkoek Zumardi Handira jo behar dute Ibarratik sartu edo ateratzeko. Horretarako harrizko zubitxoa itxi dute, baina pasabide berri bat ireki dute Euskal Herria kaleko lehen zenbakian eta hortik jo daiteke Zumardi Handira sartzeko zubira. Autoen pasabidea, errepidea, ez dute itxi, eta urria bitarte hainbat moldaketa izango baditu ere, irekita mantenduko dutela esan dute.
Ez da aldaketa bakarra, izan ere, Ibarra sarreran zegoen autobus geltokia ere lekuz aldatu dute, eta atzeratu. Orain Ibarrako Euskal Herria kaleko 1. zenkian dago. Autobus geltoki berriak TO02 (Tolosa-Ibarra-Berrobi-Elduain-Berastegi), TO04 (Tolosa-Ibarra-Belauntza-Leaburu-Gaztelu), TO06 (Tolosa-Apatta Erreka) eta TO42G (Tolosa-Ibarra-Berrobi-Elduain-Berastegi) autobusei eragiten die.
Lanak Tolosana inguruan egiten ari diren etxebizitzengatik egin behar dituzte. 50 bat etxebizitza aurreikusi dituzte eta urbanizatze lanak egin behar dituzte. Lanek 1.055.423 euroko aurrekontua dute eta espaloiak zabalduko dituzte eta autobus geltokia eta beste hainbat elementu jarriko dituzte bertan.
