Maitane Garmendiak eta Beñat Doyharzabal ibartarrek larunbatean eman zioten hasiera 2017ko abentura raiden ligari, Elgoibarren III. Debabarrena Raid proban. Bikoteka lehiaturiko 7 orduko iraupeneko proba izan zen, lau sekziotan banatua, hasiera eta amaiera puntuak Elgoibarren bertan izanik. Lehen sekzioa herri orientazio motz bat izan zen, jarraian mendi bizikletak hartu eta 1.000 metrotik gorako desnibel positiboa zuen etapa gogor batean trekking-eko hasiera puntura iritsi ziren, Madariaga auzoan kokatua. Hantxe hasten zen probako sekzio erregina: 3 ordu eta 30 minutu inguruko trekking zoragarri bezain gogorra, Izarraitz mendizerra inguruan. Fisikoki nahiz orientazioari dagokionean exigentzia handikoa izan zen, baina txoko eder askoak ezagutzeko aukera eman zieten parte hartzaileei. Orientatzen fin ibili ziren ibartarrak, eta estrategiarekin ere asmatu zutenez, bizikletan galduriko denbora berreskuratzeko aukera izan zuten. Azken sekziorako 55 minutu besterik ez zituzten, bidean baliza batzuk bilduz bizikletaz Elgoibarrera iristeko. Azkenean 3 minutu faltan heldu ziren helmugara: 6.57-ko denborarekin eta probako 104 puntuetatik 93 eskuratuta, lasterketa irabazi zuten kategoria mistoan zein absolutuan. Hurrengo hitzordua maiatzaren 27an izango dute Egilorren (Nafarroa).
Garmendia eta Doyharzabal Elgoibarren nagusi izan dira, mistoan zein abslotuan.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!