Joan den martxoaren 31n auzolanera deitu zituen ibartarrak, Ibarrako Udaleko Gazte Zulok. Izen ematea zabaldu, eta herritarren erantzuna bikaina izan dela azpimarratu dute: 90 boluntario prest azaldu dira, herrian konponketa txikiak egiteko.
Horrela, beraz, gaur eta bihar ariko dira, plaza eta kultur etxe inguruetako bankuak eta farolak txukuntzen. Gaur, hasteko, prestaketa lanak egingo dituzte, txukundu beharreko hiri-altzariak lisatuz eta zintak jarriz. Ondoren, pintaketa lanei ekingo diete: Atari tabernako aldapa, kultur etxeko bankuetan eta plazan ariko dira.
Bihar, berriz, auzolanaren egun handia izango da. Horrela, goizean bezperan hasitako lanei jarraipena emango diete lehenengo eta, eguerdian, herri bazkaria izango dute plazan, auzolandegian parte hartzen dutenentzat.
Festa giroarekin biribildu nahi izan dute eguna, eta 17:00etatik aurrera erromeria ere izango dute, Iratzar taldearen eskutik. Aipatzekoa da, Gazte Zulo zerbitzuak hitzordua baliatuko duela, bihar, Iker Peredak eurentzat diseinaturiko logotipoa aurkezteko; boluntarioei kamisetak banatuko dizkiete, irudi berriarekin.