Intxaurrondoko gastronomia elkarteak Etiopian egiten zuen lan, baina errefuxiatuek bizi duten egoera ikusita Greziara joan eta bertan ere euren laguntza eskaintzea erabaki zuen. Kios uhartera joan zen elkarteko lehen boluntario taldea eta ordutik, egunero 1.700 pertsona baino gehiagorentzat otorduak prestatzen aritzen dira. Otsailean Zaporeak proiektua zabaldu eta Kios uharteaz gain, Greziako hainbat puntutara ere janaria bidaltzen hasi dira.
Uzturpe ikastolan orain zazpi urte Elkartasun Kilometroa egiten dute hainbat proiektu laguntzeko, eta aurten Zaporeak proiektuari laguntzea erabaki dute. Asteartean, hilak 28, egingo dute Elkartasun Kilometroa, 15:00etan hasita. Ikastolako ikasle eta irakasleak plazara jaitsi eta Emeterio Arreseko plazara bitarteko ibilbidea egingo dute. Ikasleek "babesleak" bilatu behar izaten dituzte eta babesle horiek guztiek emandako laguntzaren araberako bueltak ematen dituzte korrika. Zaporeak proiektuko boluntarioak ere izango dira asteartean Ibarran, eta postu bat jarriko dute.
Elkartasun Kilometroa Haitin izandako hondamendirako dirua biltzeko antolatu zuten lehen aldiz eta ordutik Saharako Tichla herrian eskola egiteko, gaixotasun arraroen AFESTTA eta Stop Sanfilippo elkarteak laguntzeko, Ziburuko Kaskarotenea ikastola babesteko eta Burkina Fasoko desnutrizioari aurre egiteko antolatu dute ekimena.