Pas Pielagos talde kantabriarraren aurka zen partida, hauek aski ezagunak EBA ligan, nahiz eta fitxaketen ondorioz urtero taldea asko aldatu. Bi taldeak beraien lehen garaipena lortzeko helburuarekin zeudela ikusirik, partida parekatua espero zen.
Markagailuan atzetik joan zen TAKE partida guztian zehar eta nahiz eta azken laurdenean 10 puntura murriztu desabantaila, ez zen nahikoa izan eta kantabriarrek eraman zuten partida.
Esan beharra dago taldeak ez zuela azken unera arte amore eman eta hori, zaletuon ikuspegitik, eskertzekoa da.
Taldeak, aldaketa asko jasatearen ondorioz, ez du oraindik bere jokoa aurkitu eta ez da bere bertsio onena ematera iritsi. Denboraldia hasi besterik ez da egin eta horregatik, taldeari konfiantza eman behar zaiolakoan nago. Taldeko kideak aski ondo ezagutzen ditut eta egoera honi buelta emateko gai direla argi daukat.
Aurrera begiratzea besterik ez dago! Akatsetatik ikasi, gogor entrenatu eta benetan gauzak aldatu daitezkeela sinisteko garaia da! Animo TAKE!