Eskualdeko udalek eta Tolosaldea Garatzenek, urtero, aldarrikapenarekin bat egin dute herritarrentzat ekimen ezberdinak antolatuz.
Ekainaren 1ean hasi zituzten ekimenak Tolosan. Bertan Tolosaldeko Eskola Agenda 21en barruan, Tolosaldeko VIII. Topaketak egin zituzten. Ordutik, Aduna, Amasa-Villabona, Alkiza, Alegia eta Ibarran ere burutu dituzte ekimenak.
Ibarran, esaterako, aurtengoan Zelai errekari «garrantzia» eman nahi izan diote Ainhoa Alonso Ingurumen Teknikariaren esanetan. Horretarako, gaur, Ura agentziako Aizpea Errastik eta Xabier Goienetxeak Uzturpe ikastolako DBH2ko ikasleei errekaren inguruko azalpenak eman dizkiete urte guztian ur agentziak Zelai errekan egiten dituen ekintzen inguruan; esaterako, landare inbaditzaileen ingurukoan egiten dituzten jarduerak.
Bestalde, erreka horretan gazteek udan bainua hartzeko duten ohitura dela eta, «bainurako gunea ez dela» azaldu diete «propietate biologikoak ez daudelako horretara egokituta».
Azkue auzoko guneaz gain, plaza inguruko errekaren bi paretak ere nola dauden aztertu dute, bi guneen arteko aldea konpara zezaten: «Ikus dezaten zer alde dagoen tratatzen den gune baten eta bestelakoaren artean».
Gazteek «interes handiarekin» jarraitu dituzte teknikarien azalpenak, eta galdera asko ere egin dizkiete.
HURRENGO EGUNETAKO DEIALDIAK
Aduna
Ekainak 9, osteguna. Etiketek hitz egiten dute hitzaldia, Kontsumobiderekin, kultur aretoan, 11:00etan.
Alegia
Ekainak 14, asteartea. Ibai garbiketa, DBH eta Gaztetxeko gazteekin.
Ibarra
Bihar, ekainak 8. Konposta banaketa San Bartolome plazan, 10:00etatik 12:00etara.
