Mugarik Gabeko Medikuak (MGM), Gobernuz Kanpoko Erakundeak, Mediterraneo itsasoan salbamendurako erabiltzen duen itsasontzietako bat da, Dignity 1 itsasontzia. Bertako kapitaina da, berriz, Madeleine Habib. Kapitain australiarra ostiral honetan Ibarran izango da erreskate operazioetan bizitako esperientzien berri ematen, 11:00etan, kultur etxean. Hitzaldian erabiliko den hizkuntza ingelesa izango da.
Hain zuzen ere, Uzturpe ikastolak antolatutako ekitaldia izango da honakoa, baina gaiak sor lezakeen interesa dela eta herritar guztiei zabaldu diete deialdia. Ikastola errefuxiatuen krisia bete-betean aztertzen ari dela eta, kapitain australiarrak erreskate operazio hauen nondik norakoak azaltzeko proposamena egin zioten eta onartu egin du. Hortaz, Ibarran Mediterraneo itsasoan bizitzen ari diren egoeraren berri lehen pertsonan izateko aukera egongo da.
MGMren hiru itsasontzik osaturiko flotak 20.000 lagun atera zituen mediterraneoko uretatik 2015ean. Iragan apirilean ekin zion berriz erreskate operazioari.