Pasa den ostegunean Ibarrako udalbatzak egindako ohiko plenoan onartu zen Ibarrako Udalaren 2016ko aurrekontua. EH Bilduren eta EAJren aldeko botoekin izan zen onartua aurrekontua. Oposizioko Itziar Jauregi jeltzaleak «landutako aurrekontuak» izan direla adierazi zuen plenoan.
2015eko aurrekontuarekin alderatuz «igoera» izan zutela adierazi zuen Mikel Agirrezabala alkateak. Hain zuzen ere, 2015ean 4.455.780 euroko aurrekontua izan bazuen udalak, aurtengoan 4.728.000 eurokoa onartu du.
Langileen arloan, «apustu berri bat» egingo du udalak. Izan ere, aldi baterako langileen kontratazioez gain, Udaltzaingoaren gorputzaren sorreraren aldeko «apustua» egingo dutela jakinarazi zuen Agirrezabalak. Arlo berean, TAO zerbitzua «publifikatzea» ere udalaren 2016ko helburuen artean kokatzen dutela jakinarazi zuten.
ZERBITZUAK ETA INBERTSIOAK
Zerbitzuen arloari dagokionez, aipatu udalaren aurrekontuetan kale garbiketan «hobekuntza» egiteko aurreikuspena dagoela, eta horretarako 14.000 euro «gehiago» bideratuko dituzte.
Barne eta kanpo komunikazioa hobetzeko asmoz ere, kontratazio berri bat egitea aurreikusten du udalak. Helburua sare sozialak, web orria, etab. eguneratuak izatea da, herritarrekin komunikazio hobe bat izateko. Horretarako ere, 14.500 euro bideratuko ditu udalak.
Bestalde, zerbitzuei lotuta ibilbide osasuntsuak egiteko ekimena martxan jartzea ere helburu izango dute aurtengoan.
Inbertsioetan 278.000 euro inguru gastatuko ditu udalak. Beheko taulan ikus daitezke inbertsioak eta horietarako aurrekontuak.
Inbertsioen artean kokatzen da, esaterako, Emeterio Arreseko parkea estaltzeko azterketa. Baina, horrez gain gune horretan mantenu lanak ere egingo dituzte: frontoia margotu eta helduen parkeko zorua berritu.
INBERTSIOEN ATALEKO DATUAK
Ibai-gain 4 (ludoteka zaharra) berritze lanak 65.000
Bide azpiegitura eta irisgarritasuna 56.000
San Bartolome estalkia ixtea 40.000
Euskal Herria 59-75 urbanizazioa 30.000
Haur parkeen mantentzea 20.000
Kiroldegiko tresneria 18.000
Kiroldegi atzeko asfaltatzea 15.000
Izaskungo ermita inguruan asfaltatze lanak 14.000
Berdintasun plana 12.000
Emeterio Arreseko parkea estaltzeko azterketa 8.000