Gabonak girotzeko hainbat ekimen antolatu dituzte Ibarran

Gabonak gero eta gertuago daude, eta Ibarran aurretik ditugun egun horietarako egitarau zabala prestatu dute herriko eragile ezberdinekin. Astelehenean egin zuten aurkezpena udalak, merkatarien elkarteak, Hauspoa elkarteak, Gaztelekuak eta Uzturpe ikastolak.

Arkaitz Fraile, ingurumen eta merkataritza zinegotziak udalak energia kontsumoa «aurreztu» nahian, aurten ere kutsadura luminikoa «murriztu» nahi izan duela azaldu zuen. Bost urtetan egindako bidean jarraitu nahi dutelarik.

Kutsadura hori murrizteko ikastolako haurrek egindako apaingarriak jarri dituzte herrian zehar, «dena material birziklagarriaz eginda». Emaitza «oso polita» dela esan zuen Frailek eta horregatik ikasleek egiten duten lana «txalotu» zuen.

Herrian jarri dituzten argiak abenduaren 17an piztu eta urtarrilaren 7an itzaliko dira, 18:00etatik 21:30era.

Bestalde, merkatariekin elkarlanean udalak TAO txartelak atera ditu. Jada hasi dira txartel horiek banatzen eta urtarrilaren 31ra bitarte herriko dendetan erosketak egiten dituztenen artean, ordubetez doan aparkatzeko aukera izango da. Guztiaren helburua, ibartarrak «herrian bertan kontsumitzea» da, gainera, horrek «herrian bizia» sortzen duela uste du udalak.

Eragileen parte hartzea

Gabonetarako osatutako egitarauan, besteak beste, Ibarrako merkatarien elkarteak parte hartu du, eta Eider Otamendi elkarteko lehendakariak eman zuen guztiaren berri.

Batetik, errege bezpera bitarte Ibarrako saltokietan egiten diren erosketen truke bezeroei boletoak banatuko dizkiete euren datuekin bete eta saltokietako kutxetan sartzeko. Urtarrilaren 11n, 100 euroko lau opari txeke zozketatuko dituzte, saltoki bazkideetan gastatzeko.

Bestalde, Urtezahar eguneko krosean parte hartzen duten guztien artean opariak zozketatuko dituzte lasterketa amaitzerakoan: «Saltoki bakoitzak opari bat jarriko du».

Gazteak ere aintzat izan dituzte, eta «bizilagun eta bezeroei aisirako eskaintza integralagoa» eskaintzeko asmoz hainbat ekimen antolatu dituzte Gaztelekuko begiraleen laguntzarekin: mahai jolasak, joko kooperatiboak, sukaldaritza tailerra, saskigintza eta panpin tailerra...

Haur eta nerabeentzako zerbitzu horretan izena emateko ludotekara edo gaztelekura jo daiteke, abenduaren 18a, ostirala, bitarte. Berezia da abenduaren 29an egingo den sukaldaritza tailerra. 12-16 urte bitarteko 15 pertsonentzako lekua dago ikastaroan, eta parte hartu nahi dutenek Kiribil ile apaindegian eman beharko dute izena. «Tokiko komertzioetan sasoiko produktuak erosten ikastea eta sukaldearekin harremanak izaten hastea» dira helburuak.

Gainera, abenduaren 22an eta 23an hiru puzgarri ere jarriko dituzte, adin ezberdinetara egokituta. Sarrera doan izango da. Eta umeak bertan daudela Eguberrietako erosketak egiteko «aukera ona» izan daitekeela uste dute.

Hauspoa elkarteak, berriz, Olentzeroren jaitsiera eta Urtezahar eguneko krosa antolatuko ditu urtero bezala. Olentzero eta Mari Domingi, 18:00etan iritsiko dira plazara. Loatzo musika eskola, Alurr dantza taldea eta herriko abesbatza zain izango dituzte abestiak eskaintzeko. Ondoren, haurrek Olentzero eta Mari Domingirena jotzea izango dute desioak eskatu eta opariak jasotzeko.

Gaztelekuaren inagurazioa

Mikel Zurutuza da Gaztelekuko begiraleetako bat, eta jada proiektuan martxan jarrita dagoen arren abenduaren 18an, ostiralean, 19:00etan Gaztelekuaren inagurazioa egingo dutela adierazi zuen: «Orain arte egindako lanak erakusteko eta jendeari gerturapen bat egiteko». Interesa duen oro bertara joatera gonbidatu zuten «egitura eta material aldetik, eta eskaintzari dagokionez» bertan dagoena ikusteko.

Gabonetako zerbitzu bereziaren berri ere inagurazioan emango da. Hala ere, Gabonak igarotako aurretik ezarrita dagoen ordutegira itzuliko litzateke.

Egitaraua