Alurr dantza taldearen hurrengo hitzordua, Ikaztegietan

Uztailean zehar herriz herri ibili dira Alurreko dantzariak. Pasa den astean bertan Oreka Tx eta Kalakanekin batera Ezpeletako Gazteluan emanaldia izan zuten. Eta ez hori bakarrik, Sopuertako Nazioarteko XXV. Folklore Jaialdian  ere izan ziren Serbiako talde batekin batera eta baita Mendaro zein Soraluzeko jaietan ere. "Ikuslegoaren erantzuna arrakastatsua izan da emanaldi guztietan, bai ikusle kopuruagatik eta baita ere dantza taldearen lan ona goraipatu izanagatik", esan dute.

Datozen asteetan ere emanaldiak izango dituzte: igandean Ikaztegietan, astelehenean Berastegin, abuztuaren 23an Ibarran Bi punturen artean ikuskizuna eskainiko dute, eta 30ean Berrobin egongo dira.

Era berean, datorren ikasturterako izen ematea zabalik dagoela gogoratu dute. Horretarako www.alurr.net webgunera jo behar da edo 635 75 70 48 telefono zenbakira deitu edo whatsappa bidali.

Astean behin helduei zuzendutako plazako dantzen eskolak eskainiko dituztela esan dute eta berriz ere 10 eta 14 urte arteko mutilen bi talde egongo direla gogoratu du Alurrek.