Pasa den urtarrilean Carlos Urkijo Espainiako Gobernuaren EAEko ordezkariaren aginduz euskal presoen Euskal Herriratzea eskatzen duen banderola kendu behar izan zuten udaletxeko balkoitik, eta "inposaketa" horri erantzuteko plazan jarri dute herriko hainbat eragileren babesarekin.
Lehenik eta behin, Urkijoren azken urteetako "erasoen" berri eman zuten ekitaldian, eta ondoren, txalapartariak egon ziren. Herriko euskal preso eta iheslarien lagun eta senitartekoen testigantzak biltzen dituen bideo bat ere ikusi ahal izan zen. Alurr dantza taldeko kideek Ikurrinaren dantza eskaini eta gero jarri zuten banderola, plazako farola batean.