Mattin De la Sotilla:
Finalerako txartela lortzeko bi aurre jardunaldi jokatu ziren pisu horretan. Lapurtarrak eta bizkaitarrak erabat nagusitu ziren tiraldi horietan, eta txapela bietako baten eskuetan zegoela zirudien. Une erabakigarrian, ordea, finalean, Ibarra indartsu agertu eta tiraldi guztiak irabazi zituen.
405 kilokoan, aukera handiagoak zituen Ibarrako zortzikoak. Jardunaldi batean lehen postuan sailkatu zen, eta bestean bigarren. Gaztedik gauza bera egin zuenez, eta kasu honetan puntuak pilatzen zirenez, hirugarren jardunaldira berdindurik iritsi ziren Ibarra eta Gaztedi. Ondorioz, hauen artean ere finala jokatu zen. Aian, lehen bueltan eskualdekoak nagusitu ziren, eta bigarrengoan berdintzea lortu zuten, txapela irabaziz.
Mattin De la Sotilla goma gainean egon zen finalean, 640 kilotan. Txapelarekin pozik zegoen ibartar-tolosarra: «Iaz zer egin genuen ikusita, ez geneukan esperantza handirik pisu honetan. Horri gainera, 680koan lortu genuen bigarren postua gehitu behar zaio. Frustrazio pixka batekin gentozen final honetara, aurreko jardunaldietan ere ezinean ibili baikinen. Hala eta guztiz ere, irabaztea lortu genuen, eta gustura».
Lehen posturako bi hautagai nagusi zeudela dio De la Sotillak: Abadiño eta Ñapurrak: «Horiek izan dira indartsuenak pisu honetan. Zozketan suertea izan genuen, eta segidan neurtu genituen Abadiñoren aurka indarrak, eta irabaztea lortu gainera. Horrek animoak eman zizkigun». Ñapurraken kasua berezia da. Finalaren aurreko jardunaldietan beti indartsuenen pare ibiltzen dira lapurtarrak, baina finaletan, behera egiten dute. Oraingoan ere antzeko zerbait gertatu zitzaien.
405 kilokoaren inguruan, Mattin De la Sotillak dionez, «ez da horrenbesteko ezustekoa izan, baina bai pozteko albiste handia. Pisuan behetik ibili arren, tiraldi gogor eta luzeak irabazi zituzten, eta hori azpimarratzekoa da».
Argazkiak: Olatz Artola