Ibarran Euskal Herriko zazpi probintzietako pertsonak aurkitu daitezke gaur. Izan ere, Euskal Herria eguna ospatzen ari dira seigarren urtez, hirugarrenez Ibarran; eta orain arte ibartarrak Algorta eta Lizarrako lagunekin elkartu badira ere, aurten estreinakoz zazpi probintzietako ordezkariak daude gurean.
Aldarrikapenak eta festak bat egiten dute egun honetan, eta horregatik Bai Euskal Herriari ekimenaren ondotik sortutako egun honek festa giroa izaten du nagusi. Horretarako egitarau zabala dute prestatua, eta jada hasita dagoen festak luzaro iraun dezake gaurkoan ere.
Goizean, Ibarrara etorri diren gonbidatu edo lagun guztiei harrera egin diete, eta kalejiran guztiak plazara jaon dira. Bertan haurrek eta helduek zirkoloretsuaz gozatzeko aukera izan dute; umoreak ere bai baitu lekua festa honetan.
Ongietorri ekitaldia eguerdian ospatu dute, eta jarraian, plazan bazkari ederra egin dute. Nagiak jota edo herrien arteko erronkari ekitea kosta zaie, baina, azkenean lau talde egin eta ekin diete proba gogorrei. Lehenik, Lizarra eta Ipar Euskal Herriko taldea lehiatu dira. Gero Algortakoak Ibarrakaoen aurka. Denborarik onena egiten zuenak irabazi du eta kasu honetan, azken urteetako garailea den Ibarrari irabazita, Lizarrakoak izan dira garaile.
Erronka mikrofonoz komentatu dutenek esan duten moduan, orduantxe hasi da festa! Atsedenik hartu gabe kalejirarekin giroa sortzen jarraitu dute guztiek. Eta Subegin egingo duten afariaren ostean, parranda ederra botatzeko aukera izango dute. Lehenik Meraki eta Ezen Balea taldeek eskainiko dituzte kontzertuak. Baina, hauek amaitutakoan Dj BUllek hartuko du txanda, eta ziur goizaldera arte gorputzak astintzen ibiliko direla indarrak dituztenak.
Egitaraua
11:00. Hamaiketakoa Arane iturrian.
Ondoren. Kalejira musikaz alaituta.
12:30. Zirkoloretsua pailazoen ikuskizuna plazan.
13:30. Ongi etorri ekitaldia.
14:15. Bazkaria.
17:30. Erronka herrien artean.
19:30. Musikarekin kalejira.
20:30. Afaria Subegi elkartean.
22:30. Kontzertuak gaztetxean: Meraki, Ezen Balea eta DJ Bull.
Egun osoan. Bai Euskal Herriari ekimenak antolaturiko naziotasuna lantzen duen erakusketa, plazan.