Hasieran gure herrian eta ondoren ekitaldi nagusian, aniztasunak bilatu du elkargunea eta gurea den eskubide baten alde denok batera aritu gara. Dendariak, tabernariak, kirolariak, Osasun Etxeko langileak, dantzariak, gazteak, aisialdikoak, parrokiako kantariak, ... eta norbanakoak, denon artean osatu dugu giza talde nahikoa gure bultzadak bere eragina bete dezan.
Denoi zoriontzeko moduko ahalegina burutu dugula ez dugu dudarik egiten. Ibartarrok gai garela aurreiritziak alde batera uzteko eta elkarrekin lana egiteko, batzen gaituen horren mesederako, noski. Ez ikasi, erakutsi ere egin dugu eskutik helduta erronkak gainditzeko errazagoa dela.
Ibarran hau dena dinamizatu duen taldearen izenean eskerrik asko eta aurrerantzean, zerbaitetan laguntzerik badugu, berriro hor izango garela jakin. Taldearen izaera guztiz irekia da eta ateak edozeinek zabalik izango dituela zalantzarik ez izan.
Ibarrako Gure Esku Dago batzordea