Jokin Aranalde iheslari gazteluarraren aurkako euroagindua salatzeko kanpaina jarri dute abian Ibarran. Manuel Valls Frantziako Barne ministroari eskutitzak bidaltzeko eskatu dute Sortutik, eta horretarako egin beharreko urrats guztiak azaldu dituzte. Bidali beharreko gutuna ere zintzilikatu dute sortu.net eta ibarrakosortu.blogspot.com.es webguneetan. Aranalderen aurkako euroagindu eskaria salatzearekin batera, Aitor Zubillaga eta Ibon Fernandez Iradirenak ere salatu dituzte. Manuel Valls-i «konponbide garaia» dela esan diote sortutik, eta Espainiaren eskaria bertan behera uzteko eskatu diote.
Batzar informatiboa, gaur
Paueko epaitegiak uztailaren 16an jakinaraziko du hiru euskal herritarren inguruko erabakia. Euroagindua onartu edo ez, Ibarran batzar informatiboa egingo dute bihar, 19:30ean, plazan. Ibarrako Sortutik eskualdeko herritarrak gonbidatu dituzte batzar informatibo horretara.