Jendetza bildu da gaur goizean Hernialden. Izan ere, lehenengo aldiz egin dute artisau azoka. Herriko frontoian jarri dituzte postuak; guztira, 22 postu izan dira. Denetariko produktuak ikusi, erosi eta dastatzeko aukera izan da bertan. Tartean herritarrek ere ekarpena egin nahi izan diote azokari: elkartean pintxoak eta edariak banatu dituzte eta herriko haurrek egindako eskulanak ere erakutsi dituzte frontoian. Herritarren lanekin erakusketatxo bat ere muntatu dute eta Manolo Arroyoren antigoaleko gauzak, Mari Carmen Niñoren margolanak eta Laureano Aranaren eskuz egindako labanak ikusi ahal izan dira bertan. Horrez gain, zuzeneko musikak ere ez du hutsik egin gaurkoan, eta trikitilari eta pandero joleek girotu dute goiza.