«Sekulako esperientzia izan zen Europako Txapelketa»

Asteburuan Espainiako Kros Txapelketan lehiatu zara, eta zortzigarren egin duzu 23 urtez azpikoan. Nola joan zen?

Gogorra izan zen. Orain arte lau edo bost kilometroko lasterketak egiten aritu naiz, eta aurretik ez nuen behin ere egin hamar kilometroko lasterketarik. Baina uste baino hobeto joan zen eta asko gustatu zitzaidan. Ez nuen buruan zehaztuta postu bat, baina aurrean egon nahi nuen. Zortzigarren postuarekin gustura nago, baina hurrengoan hori hobetzeko asmoa dut. Nire lehenengo urtea da 23 urte azpiko mailan, eta beste asko zeuden mota honetako lasterketa bat eginda zituztenak. Ni berria nintzenez, presio gutxiago nuen.

Neguko denboraldiari errepasoa eginez, Europako Kros Txapelketan parte hartu zenuen, 49. eginez. Nola joan zen esperientzia?

Sekulakoa izan zen. Nire lehen aldia zen maila horretako txapelketa batean. Ia dena berria zen, eta urduritasun handia nuen, baina oso gustura. Emaitzari ez nion begiratu, esperientziari eta bizitako guztiari erreparatu nion.

Sevillako Italica krosean laugarren egin behar izan zenuen Europakora joateko.

Banekien lortu ahal nuela, baina ni bezala beste asko zeuden. Helburua hori zen, baina banekien zaila izango zela. Amaieran bosgarrenak ia aurreratu egin ninduen, eta ikusi nuenean laugarren iritsi nintzela, sekulako momentua izan zen.

Elgoibarko nazioarteko krosean lehen emakumezko euskalduna izan zinen.

Maila berrian lehenengo lasterketa izan zen, eta asko gozatu nuen. Jende asko zegoen animatzen, eta sekulako giroa zegoen. Oso polita izan zen, eta emaitzarekin oso gustura nago.

Zein izan da neguko denboraldiko proba garrantzitsuena?

Zalantzarik gabe Europako Txapelketa. Hor atleta asko ez nituen ezagutzen. Espainiako selekzioko jende asko ezagutu nuen, eta lagun asko egin nituen.

Aurrera begira, pista estaliko Espainiako Txapelketa duzu, otsaileko bigarren asteburuan. Zer asmo duzu bertan?

Beldurrik gabe ateratzea, ahalik eta marka onena egitea, ea nire marka pertsonala hobetzen dudan, eta ahal dudan postu onena lortzea.

Txapelketa hori eta gero, aire libreko denboraldia hasiko da. Zer helburu duzu?

Espainiako Txapelketa da helburu nagusia, uztailaren 6an egingo dena. Mailaz pasatzean, ez dago 3.000 metroko proba, eta 1.500 edo 5.000 metrokoa aukeratu beharko nuke. Pentsatuta dugu 5.000 metroko probari heltzea. Entrenamenduari dagokionez, oso antzekoa izango da, baina bolumen gehiago sartu beharko dut.