ERTZAINTZAREN KONTAKETA:
"Joan den maiatzaren 7an Gasteizen egindako operatiboan ertzainek hiru gizon atxilotu zituzten eta bi emakume inputatu zituzten osasun publikoaren aurkako delitu bat leporatuta.
Arabako hiriburuko bi etxebizitza miatu zituztenean, polizia-dispositiboak, epaileak gainbegiratuta, marihuana-kukuluak, 2 kilogramo, eta 23.000 euro atzeman zituen.
Jarduketa horren ostean Arabako Ikerketa Kriminaleko Lurralde Zerbitzuak (SICTA) ikertzen jarraitu zuen atxilotuen hornitzaileak identifikatzeko helburuarekin. Ikerketa horri esker, atzo beste operatibo bat garatu zuten aldi berean Murgian, Hernialden eta Albalate de Zoritan (Guadalajara), eta Esku Hartzeko eta Txakur Unitateko agenteek, Brigada Mugikorreko Bizkor patruilak eta Oriako eta Gasteizko ertzain-etxeetako agenteek parte hartu zuten.
Hernialdeko baserrian sartu eta miaketa egin zutenean, 400 marihuana-landare aurkitu zituzten eta gizon bat atxilotu zuten.
Bestalde, Albalate de Zoritan Guardia Zibilak, SICTAko agenteak aurrean zirela, bi txalet miatu zituen eta bi pertsona atxilotu zituen. Eraikinetako batean 1.000 marihuana-landare aurkitu zituzten, eta bestean plantazio handi baterako beharrezko material guztia zuen azpiegitura bat.
Azkenik, Murgian gizon bat atxilotu zuten eta emakume bati eginbideak hasi zizkioten ikertu gisa. Euren etxean 16.000 euro eta Guadalajarako txaletekin zerikusia zuten agiriak aurkitu zituzten. Bi pertsona horiek maiatzaren 7ko operatiboan atxilotu zutenetako batekin erlazionatzen dituzte.
Taldeak Euskal Autonomia Erkidego osoan saltzen zuen droga. Pertsona horiei guztiei substantzia sorgorgarrien trafikoa, argindarrarekin iruzur egitea eta talde kriminaleko kide izatea leporatu dizkiete. Atxilotuak Ertzaintzaren egoitzetan daude, epailearengana eraman zain".