Koronabirusa

Hernialdeko Udalak neurriak hartu ditu COVID-19a dela eta

"Ez gaitzen alarmismoan erori baina arduratsuak izan gaitezen", aipatu dute udal ordezkariek. Herriko zenbait zerbitzu murriztu dituzte osasun krisiagatik.

Hernialdeko Udalak ebatzi du, udaletxeko bigarren solairuko aretoa, liburutegia eta ludoteka ixtea. Bertan ezingo da inongo jarduerarik egin. Kaleratutako oharrean aipatzen dutenez, "komenigarria eta zentzuzkoa da pilotalekua, jolas parkea eta antzeko eremuak ez erabiltzea eta jende pilaketak ekiditea egoera berezi honek irauten duen bitartean".

Udal eraikinei dagokionez, udal bulegoetan, COVD-19aren inguruan ezarri diren garbitasun protokoloak jarraitu beharko direla aipatu dute udal ordezkariek, eta telefono bidezko zerbitzua lehenetsiko dela. Gizarte zerbitzuei dagokionez ere, telefono bidezko zerbitzua lehenetsiko da, eta zerbitzu presentziala eskatzen den kasuetan garbitasun protokoloa mantendu beharko da.

Herritarrei zuzendutako oharrean Aitor Zubillaga alkateak zera aipatzen du: "Osasun profesionalak gogor ari dira lanean egoera honi aurre egiteko, orain herritar guztioi dagokigu haiei laguntzea. Gure gain hartu behar dugu erantzukizunaren partea eta kutsatzeak ahalik eta gehien saihestu. Egoera honek sortutako eragozpenei modu bateratuan aurre egingo diogulakoan eskerrak eman nahi dizkizuet".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!