Laugarren urtez egingo dute Hernialden Nekazari, Abeltzain eta Artisau Azoka. Igandean, herriko pilotalekuan, 10:00etatik 14:00etara jarriko dituzte postuak baserritar eta artisauek. Igaro Balda alkatearen esanetan, «eskualdeko jendea ere gerturatuko da bere produktuak erakustera. Hori bai, abere guztiak herrikoak izango dira». Frontoiaren atzealdean erakutsiko dute herriko bospasei abeltzainek euren ganadua.
Duela bi urte bezala, baserriko lanabes zaharren erakusketa ere egingo dute igandean. «Norberak etxeko ganbaratik berreskuratzen dituen tresnekin osatuko da erakusketa», Baldaren esanetan.
Asto desafioa arratsaldean
Herriko festetan, Hernialdeko Galardi baserrian bizi den Eneko Seinek apustua jokatu zion Joxe Mari Olasagastiri. Seinek bi astoak, Olasagastiren idiaren aurka. Abuztuan, Igeldora joan zen saria. «Horrelako desafioek ikusmin handia sortzen dute», dio Baldak eta horregatik erabaki dute errepikatzea.
Igandean, 18:00etan, Seinen asto parearen eta Errezilgo Koateiren asto bakarraren arteko desafioa jokatuko da, 550 kiloko harriari tiraka zeinek plaza gehiago egin.
Hernialden bilduko dira baserritar eta artisauak
Igande goizean, frontoian izango dira postuak ikusgai eta arratsaldean, 18:00etan, asto desafioa egingo dute.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!