Gaur, goizaldeko hirurak jota, Hernialdeko enpresa batean lapurretan ari zirela jakinarazi diote Ertzaintzari eta Tolosatik Hernialderako bidean, patruila bat ibilgailu susmagarri batekin gurutzatu da eta lau gizon zihoazen ibilgailua gerarazi du.
Agenteek identifikatu egin dituzte lau gazteak eta autoa miatu ostean, eskularruez eta erremintez gain, maletategian mekanizatzeko brontzezko piezak eta kobrezko kablea aurkitu dituztela jakinarazi dute.
Bitartean, beste patruila bat ustezko lapurreta egin den lekura abiatu da. Enpresako leihoetako bat bortxatu eta bulegoa hankaz gora jarri dutela egiaztatu dute. Ibilgailuan aurkitutako materiala enpresa horretakoa zela egiaztatu ostean, ertzainek lau pertsona horiek Ertzaintzaren Tolosako egoitzara eraman dituzte atxilotuta.