Bihar eguerdian hasiko dira ofizialki Gazteluko Andre Mari jaiak, txupinazoarekin. Gaur, ordea, jai giroko ekitaldiak egiten ari dira herrian. Arratsaldean, plaza atondu dute biharko eta etziko festen egunetarako. Ondoren, herriko zenbait gaztetxok Gazteluko Sega Ligaxkako bigarren jardunaldia jokatu dute. Lehena, San Joan bezperan jokatu zuten, ekainaren 23an. Hirugarrena eta azkena, San Migel egunaren bueltan jokatuko dute.
Gaurko jardunaldian, honakoa izan da sailkapena:
- Aner Zunzunegi eta Irati Tome.
- Mari Olazar eta Claudia Pellus.
- Zoreen Goikoetxea eta Lorea Zunzunegi.
- Lorea Zunzunegi eta Haizea Larrañaga.
Sega ligaxkako jardunaldiaren ondoren, desafioa egin dute hiru gaztetxok. Urko Tomek erronka bota die Laia Zubiriari eta lehenago ligaxkako jardunaldian parte hartu duen Zoreen Goikoetxeari. Tomek sail bat moztu behar zuen, berak bakarrik, eta Zubiriak eta Goikoetxeak bien artean moztu behar zuten sail bat. Oso gutxigatik, baina Tomek lortu du garaipena.
Une honetan, Jazinta la potra antzezlana ari dira egiten ostatuko terrazan. Eguna amaitzeko, barrikotea izango dute plazan.
Biharko eta etziko egitaraua, hemen ikusgai.
