Gazteluko Ostatua hartuko duen ostalari baten bila dabiltza, eta dagoeneko lizitazioa martxan da. Eider Olazar alkateak adierazi duenez, «paraje dotorean dago herriko ostatua, Tolosatik 6 kilometrotara eta instalazio eraberrituekin».
Terraza ederra du kanpoan, bezeroen erakargarri nagusienetako bat izan daitekeena, baina ez bakarra, barruan herri kiroletako erakusketa bat ere topatuko baitute bisitariek. Jangela aparta du, alkateak zehaztu bezala, «berrogeitik gorako jatunentzat lekua duena» eta askotariko jokoekin leku bat ere aurkitu daiteke bertan.
Lanerako sukalde ederra dauka ostatuak, eta bertako produktuak eskaintzeko txokoa ere atondu dute. Atsedenerako gunea ere izango dute langileek, «atsedena har dezaten eta baldintza ezin hobeetan lan egiteko». Erraztasunak ere jarri dituztela jakinarazi du alkateak, «alokairu oso merkea eta laguntza gastuetan».
Izen-ematea
Gazteluko Ostatua hartzeko interesa dutenek maiatzaren 2a baino lehen aurkeztu beharko dituzte proiektuak. Informazio gehiago lortzeko edo baldintzen berri izan nahi dutenek udalarekin jarri beharko dute harremanetan, 943 20 52 00 zenbakira deituta edo udala@gaztelu.eus helbide elektronikora idatzita. Pleguak udalaren web orrian –Gaztelu.eus– daude ikusgai.