Azokarekin agurtu dute Gazteluko asteburu kulturala, eta giro ederrean egin dute gainera. Euria emana bazegoen ere, behe-laino artean zabaldu dute azoka herriko plazan. Herritar ugari bildu dira goizean, eta bertan herriko zein inguruko artisauen produktuak ikusi, dastatu eta erosteko aukera izan dute. Denera 20 postu inguru bildu dira; baserriko produktuez gain, bitxiak, arropak edota jostailuak izan dituzte aukeran, besteak beste.
Asteburuko egitarauarekin amaitzeko, 14:00tan, jubilatuen bazkaria egingo dute Erroizpe elkartean.